İran parlamentinin spikeri Əli Laricani deyib ki, Azərbaycan tərəfi maraqlı olarsa, İran Qarabağ münaqişəsinin həllində vasitəçi ola bilər. "Qarabağ münaqişəsi Azərbaycanın ərazi bütövlüyü, danışıqlar yolu və regional ölkələrinin iştirakı ilə öz həllini tapmalıdır. Böyük güclər öz mənafelərini düşünürlər və problemin həlli əvəzinə öz mənafeləri uğrunda oyun oynayırlar", Laricani deyib. Laricani Qarabağ ərazisində tarixi və islami abidələrin dağıdılması ilə bağlı İran parlamentinin mövqeyi barədə sualı cavablandıraraq bildirib ki, "əgər dost Azərbaycan ölkəsi bu problemin həlli ilə bağlı hər hansı bir siyasi format hazırlayarsa, İran bu format çərçivəsində öz dəstəyini verməyə hazırdır".

Laricaninin Azərbaycana səfəri cümə günü başlayıb.

Səfər İran-Azərbaycan parlamentlərarası əməkdaşlığının genişləndirilməsi məqsədilə həyata keçirilib. Laricani Azərbaycana Milli Məclisin spikeri Oqtay Əsədovun dəvəti ilə gəlib.

İran parlamenti sədrinin Bakıda Oqtay Əsədov, Baş nazir Artur Rasizadə və ölkənin digər rəsmi şəxsləri ilə görüşlər keçirib.

Bundan əvvəl İran parlamenti rəhbərinin Azərbaycana səfəri fevrala planlaşdırılsa da, spikerin iş qrafikinin sıxlığı ilə əlaqədar səfər təxirə salınmışdı.