Azərbaycanda Vətəndaş Cəmiyyətinin İnkişafına Yardım Assosiasiyası

Elmar Məmmədyarov Münhen təhlükəsizlik siyasəti konfransında iştirak edəcək

gunay — Wed, 01 Feb 2012 18:43:46 +0400

Azərbaycanın xarici işlər naziri Elmar Məmmədyarov fevralın 3-5-də Münhendə keçiriləcək 48-ci təhlükəsizlik siyasəti konfransında iştirak edəcək. Bu barədə APA-ya Azərbaycan Xarici İşlər Nazirliyinin mətbuat katibi Elman Abdullayev məlumat verib. Nazir konfrans çərçivəsində müzakirələrdə iştirak edəcək, ikitərəfli görüşlər keçirəcək.

"Erməni soyqırımı" haqqında qanun Türkiyəyə qarşı yönəlib - Ərdoğan

gunay — Wed, 01 Feb 2012 18:39:47 +0400

Qondarma "erməni soyqırımı"nın inkarına görə cinayət məsuliyyəti nəzərdə tutan qanun Türkiyəyə qarşı yönəlib və ona qarşı ədavət münasibətinin əlamətidir. Trend-in "TRT Haber" telekanalına istinadən verdiyi məlumata görə, bu barədə çərşənbə günü Türkiyənin Baş naziri Rəcəb Tayyib Ərdoğan bildirib. Baş nazir qeyd edib ki, Türkiyə islamofobiya siması qarşısında susmayacaq və Avropanı buna qarşı addımlar atmağa çağırır.

Azərbaycanın adının dəyişdirilməsi təklif olunur

gunay — Wed, 01 Feb 2012 17:22:39 +0400

Millət vəkilləri Parlamentin çərşənbə günü keçirilən iclasında Azərbaycan Respublikasının adının dəyişdirilməsini təklif ediblər. Trend-in məlumatına görə, hakim Yeni Azərbaycan Partiyasından olan millət vəkili Siyavuş Novruzov deyib ki, son zamanlar ictimaiyyət arasında Azərbaycanın Şimali Azərbaycan adlandırılması barədə təkliflər irəli sürülür. "Dünya praktikasında Şimali və Cənubi Koreya, Şimali və Cənubi Kipr kimi dövlət nümunələri var. Azərbaycanın da parçalanmaya məruz qalmış dövlət kimi Şimali Azərbaycan adlandırılması daha məqsədəuyğun olardı", - o bildirib.

Şəki Xan Sarayı

avciya2 — Wed, 01 Feb 2012 15:08:36 +0400

Şəki xanlarının yay sarayı 1761-1762-ci illərdə Azərbaycanda ilk müstəqil xanlığın əsasını qoyan Hacı Çələbi xanın nəvəsi Hüseyn xanın dövründə tikilmişdir. Dünyada öz orijinallığı ilə fərqlənən Şəki Xan Sarayının memarı Şirazlı Hacı Zeynalabdindir.

Sarayın xüsusi tikinti üslubu vardır. Sarayın tikintisi zamanı bir dənə də olsun mismardan və ya hər hansı yapışdırıcıdan istifadə olunmamışdır. Xan Sarayı 2 mərtəbədən, 6 otaqdan, 4 dəhlizdən, 2 güzgülü eyvandan ibarətdir. Mərtəbələr eyni quruluşludur: mərkəzdə böyük salon və salonun hər iki mərtəbəsindəki dəhlizlərə bitişik yan otaqlar.

Azərbaycan Parlamenti Beynəlxalq Olimpiya Komitəsinə müraciət qəbul edib

gunay — Wed, 01 Feb 2012 13:54:02 +0400

Milli Məclis 2020-ci il Olimpiya və Paralimpiya Oyunlarının Azərbaycanda keçirilməsi üçün Beynəlxalq Olimpiya Komitəsinə (BOK) müraciət qəbul edib. Trend-in məlumatına görə, müraciət parlamentin çərşənbə günü başlayan yaz sessiyasının ilk plenar iclasında qəbul edilib. Spiker Oktay Əsədov bildirib ki, Olimpiya Oyunlarının Azərbaycanda keçirilməsinə Milli Məclis də öz razılığını verir və BOK-u Olimpiya Oyunlarının Bakıda keçirilməsinə çağırır.

Fransanın həmsədrlikdən kənarlaşdırılmasının hüquqi forması müəyyənləşdirilməlidir

gunay — Wed, 01 Feb 2012 13:47:28 +0400

Fransa ATƏT-in Minsk qrupu həmsədrliyində mənəvi haqqını itirib, lakin hüquqi haqqını itirməyib. Trend-in məlumatına görə, bunu Milli Məclisin çərşənbə günü keçirilən iclasında çıxışı zamanı spiker Oqtay Əsədov deyib. "Biz Fransanın həmsədrlikdən uzaqlaşdırılmasının hüquqi formasını müəyyənləşdirməliyik. Bu, bizim istəyimizdən asılı məsələ deyil", - Əsədov bildirib. Deputat Zahid Oruc isə deyib ki, ATƏT-in Minsk qrupunun fəaliyyətini tənzimləyən hüquqi müstəvi yaradılmalıdır.

Azərbaycanda əmək pensiyalarının sığorta hissəsinin indeksləşdirilməsi aparılacaq

gunay — Wed, 01 Feb 2012 13:44:14 +0400

Dövlət Sosial Müdafiə Fondu (DSMF) bu günlərdə 2011-ci il ərzində istehlak qiymətlərinin indeksinə uyğun olaraq əmək pensiyalarının sığorta hissəsinin indeksləşdirilməsini həyata keçirəcək. Trend-in məlumatına görə, bu barədə DSMF-nin sədri Səlim Müslümov çərşənbə günü Xəzər-Avropa İnteqrasiya İşgüzar Klubunun (CEIBC) üzvləri ilə görüşündə bildirib. "Biz Dövlət Statistika Komitəsinə müraciət etmişik və bu barədə məlumatlar almışıq. 2011-ci ildə istehlak qiymətlərinin indeksi 7,9 faiz təşkil edib.

Azərbaycan Milli Məclisinin yaz sessiyası başlayıb

gunay — Wed, 01 Feb 2012 12:32:36 +0400

APA-nın məlumatına görə, dövlət himinin səslənməsi ilə başlayan yaz sessiyasının ilk plenar iclası MM-in spikeri Oqtay Əsədovun sədrliyi ilə keçirilir. İclasın gündəliyinə 4 məsələ daxil edilib. Bunlar Milli Məclisin İntizam və Hesablayıcı komissiyalarının yenidən təşkili, Milli Məclisin 2012-ci il yaz sessiyasının qanunvericilik işlər planı və “Dağınıq skleroz xəstəliyinə tutulmuş şəxslərə dövlət qayğısı haqqında” qanun layihəsinin ikinci oxunuşda müzakirəsidir.

ABŞ kəşfiyyatı Dağlıq Qarabağdakı vəziyyətdən narahatdır

gunay — Wed, 01 Feb 2012 11:52:07 +0400

ABŞ kəşfiyyatını Dağlıq Qarabağdakı vəziyyət və Avrasiyada yeni qaynar nöqtələrin baş qaldırması mümkünlüyü narahat edir. Bu barədə ABŞ Milli Kəşfiyyatının direktoru Ceyms Klepperin ABŞ Konqresi Senatının profilli komitəsindəki dinləmələrə təqdim olunmuş məruzəsində deyilir. Trend-in məlumatına görə, bu barədə İTAR-TASS xəbər verir. Məruzədə deyilir ki, Qafqazdakı nizamlanmamış münaqişələr və Mərkəzi Asiya dövlətlərindəki qeyri-stabillik "Avrasiyada qaynar nöqtələrin" baş qaldırması ən çox ehtimal olunan səbəblərindədir.

Azərbaycanın ali məktəblərinin magistraturalarına ərizə qəbulu başlayır

gunay — Wed, 01 Feb 2012 11:44:21 +0400

Fevralın 8-dən Azərbaycanın ali məktəblərinin magistraturalarına qəbul imtahanlarında iştirak üçün ərizə qəbulu başlayır. Tələbə Qəbulu üzrə Dövlət Komissiyasından Trend-ə verilən məlumata görə, ərizə qəbulu fevralın 17-dək davam edəcək. Bu müddətdə namizədlər "Bakalavrın elektron ərizəsi"ni doldurmalıdırlar. Milli Sertifikat Mərkəzinin qeydiyyat mərkəzlərinin birindən elektron imza sertifikatı əldə etmiş bakalavrlar həmin sertifikatlardan istifadə etməklə "Bakalavrın elektron ərizəsi" formasını Sənəd Qəbulu Komissiyasına müraciət etmədən təsdiqləyə bilərlər.